Talpidae

Os talpidos (scientificament Talpidae (G. Fischer), en latín) son una familia de mamiferos placentarios en a orden Soricomorpha, anque fuen clasificaus por muitos anyos en a orden Insectivora, que en l'actualidat ye en desuso.

A familia incluye, entre atros, os animals que se conoix popularment como topos u toboneros en aragonés.

Descripción

Son mamiferos con dieta insectivora, con os uellos muit atrofiaus y poca u garra vista. As orellas tamién son chicas u pueden no tener sisquiera pabellón auricular externo. Por contra, tienen o sentiu d'o tacto y l'olfacto a-saber-lo desenvolicaus, y son os principals que emplegan pa trobar a suyas presas.

Bellas especies fan vida soterrania, en túnels y matriqueras que esgarrapan en tierra, y que en aragonés se diz topineras. En ixes casos, l'anatomía tiene modificacions especializadas muit importants, como as patas debanteras evolucionadas pa esgarrapar y espaleyar a tierra ta dezaga, con os codos rotaus y os huembros robustos de maniera que as palmas les quedan orientadas ta dezaga.

O morro ye sensible en extrimo, y actúa como lo suyo principal organo sensorial, con un naso muit sensible y numbrosas mimbrisas (bigotes) pa palpar.